MANILA, Philippines – Nagsumite ng komento ang defense team ni Vice President Sara Duterte hinggil sa motion for reconsideration na inihain ng House of Representatives sa Korte Suprema (SC) para baligtarin ang desisyon nitong pagbasura sa impeachment case.
Ito ang kinumpirma ni Atty. Michael Poa, na binanggit na ang komento o oposisyon ng defense team ni Duterte ay inihain sa SC noong Lunes ng hapon.
“In deference to the sub judice rule and out of respect for the judicial process, we will not be granting media interviews or issuing further statements at this time,” ani Poa.
Kung matatandaan, idineklara ng SC na labag sa konstitusyon ang mga artikulo ng impeachment laban kay Duterte, at idiniin na ito ay barred by the one-year rule sa ilalim ng Konstitusyon at nilalabag nito ang due process.
Gayunpaman, sinabi ng SC na hindi nito inaabswelto si Duterte sa alinman sa mga paratang laban sa kanya at ang anumang kasunod na impeachment complaint ay maaaring isampa simula Pebrero 6, 2026.
Ang House of Representatives, sa pamamagitan ng Office of the Solicitor General, ay naghain ng mosyon para sa muling pagsasaalang-alang na naglalayong baligtarin ang desisyon ng SC. Nanindigan ang Kamara na dapat itong payagan na gampanan ang eksklusibong tungkulin nito na usigin ang isang impeachable na opisyal, at ang Senado na litisin ang kaso.
Ang iba pang mosyon para sa muling pagsasaalang-alang ay inihain na rin sa SC laban sa desisyon nito.
Noong Agosto 6, bumoto ang Senado ng 19-4-1 para ilipat sa archive ang articles of impeachment laban kay Duterte.
In-impeach ng House of Representatives si Duterte noong Pebrero 5, kung saan mahigit 200 mambabatas ang nag-endorso sa reklamo. Inakusahan ang Bise Presidente ng betrayal of public trust, culpable violation of the constitution, graft and corruption, at iba pang matataas na krimen.
Si Duterte, sa kabilang banda, ay nagsumite ng “not guilty” plea sa na-verify na impeachment complaint na inihain laban sa kanya, na tinawag niyang “scrap of paper” lamang. RNT/MND
