MAYNILA — Iginiit ni Jose Antonio Goitia na mahalagang manaig ang katotohanan at tamang konteksto sa pagtalakay ng kapayapaan at kaayusan, kasunod ng viral na insidente sa isang jeep sa Las Piñas na kinasangkutan ng ilang menor de edad.
Nauna rito, ibinahagi ni Nicolas Torre III sa social media ang naturang insidente bilang patunay umano ng paghina ng seguridad, at binigyang-diin ang pananagutan ng mga lider.
Ayon kay Goitia, bagama’t may punto ang usapin ng pananagutan, hindi aniya makatarungan na iugnay agad ang kabuuang kalagayan ng seguridad sa isang insidente lamang, lalo na kung kulang ang konteksto.
“Oo, nangyari ang insidente at ito ay nakababahala. Ngunit hindi ito pinabayaan—agad itong tinugunan ng mga awtoridad,” ani Goitia.
Sa ilalim ng pamumuno ni Jose Melencio C. Nartatez Jr., sinabi niyang mabilis ang naging aksyon ng Philippine National Police (PNP) kung saan natukoy agad ang mga sangkot at naipasa sa kaukulang awtoridad.
Batay sa paunang ulat, wala namang nasaktan at nagpapatuloy ang imbestigasyon.
Para kay Goitia, hindi ito maituturing na kapalpakan kundi patunay ng epektibong sistema ng pagtugon.
Matatandaang sinabi na rin niya na, “Huwag nating ipagkamali ang isang sandali ng kaguluhan bilang pagbagsak ng kaayusan.”
Dagdag pa niya, hindi sapat ang isang viral na video upang sukatin ang kabuuang estado ng kapayapaan at kaayusan sa bansa.
“Ang isang bansa ay hindi nasusukat sa kawalan ng insidente, kundi sa husay ng pagtugon nito sa mga ganitong sitwasyon,” aniya.
Binigyang-diin din ni Goitia na ang pananagutan ay dapat nakabatay sa katotohanan at hindi sa emosyon o galit lamang.
“Ang tunay na pananagutan ay nakabatay sa katotohanan, hindi sa piling galit lamang,” dagdag niya.
Sa kabila ng mga kritisismo, patuloy umanong pinaiigting ng PNP ang presensya ng pulisya, isinasagawa ang tuloy-tuloy na operasyon laban sa krimen, at pinapalakas ang koordinasyon sa mga lokal na pamahalaan.
Ayon kay Goitia, ang mga ganitong hakbang ay maaaring hindi laging napapansin sa social media, ngunit mahalaga sa pagpapanatili ng kaayusan sa mga komunidad.
“Ang kapayapaan at kaayusan ay hindi pinananatili sa malalakas na salita, kundi sa disiplina, konsistensi, at tahimik na pagbabantay ng mga naglilingkod,” ani Goitia.
Iginiit din niya na mahalaga ang kritisismo sa isang demokrasya, ngunit dapat itong may balanse upang maiwasan ang paglikha ng takot at kalituhan sa publiko.
Sa huli, binigyang-diin ni Goitia na patuloy ang pagkilos ng kapulisan upang tiyakin ang kaligtasan ng mamamayan—isang katotohanang aniya’y nararapat kilalanin nang may katarungan. RNT
