Kontrobersyal na Matalahib creek pumping station, ipinahihinto na ng QC gov’t

MANILA, Philippines – Nakipagpulong si Quezon City Mayor Joy Belmonte sa mga opisyal ng DPWH-NCR upang talakayin ang kontrobersyal na Matalahib Creek Pumping Station Project sa Barangay Talayan, District 1.

Batay sa pag-aaral ng QC Department of Engineering, itinayo ang proyekto sa non-building area, na labag sa Water Code at Civil Code hinggil sa easement of waterways. Dahil dito, nakahahadlang ang istruktura sa daloy ng tubig mula sa mga barangay patungong San Juan River.

Lumabas din na hindi nakipag-ugnayan ang DPWH sa lokal na pamahalaan bago ipatupad ang proyekto—isang malinaw na paglabag sa Project Coordination Ordinance ng lungsod. Bagama’t nagbigay na ng pagtutol at sulat ang Infrastructure Committee, itinuloy pa rin ng DPWH ang proyekto.

Sa isinagawang Hydraulic Analysis, napatunayang nagdulot ng pagbaha sa distrito ang pumping station, kahit sa mga panahong hindi malakas ang ulan nitong Hunyo 2025.

Inirekomenda ng QC government sa DPWH na alisin na ang proyekto at gamitin na lamang ang natitirang ₱250 milyon para sa pagpapatayo ng detention basin na may kapasidad na 65,400 cubic meters, alinsunod sa QC Drainage Masterplan.

Dumalo sa pagpupulong sina City Administrator Mike Alimurung, ACA Alberto Kimpo, City Engineer Atty. Dale Perral, City Legal Atty. Carlo Austria, DPWH-NCR Regional Director Gerald Opulencia, at QC 1st District Engineer Art Gonzales. RNT