MANILA, Philippines – Ibinalik ng Pamahalaang Lungsod ng Quezon City ang La Loma Lechon Festival 2026 ngayong Mayo 17, mula 7:00 AM hanggang 8:00 PM.
Layunin ng selebrasyon na ipagdiwang ang mayamang culinary heritage, malalim na pananampalataya, masiglang kultura, at mga lokal na negosyo ng La Loma.
Kasabay ito ng pista ng Nuestra Señora de Salvacion de La Loma, at kinikilala ang La Loma bilang Lechon Capital of the Philippines. Layunin din ng festival na palakasin ang turismo, kabuhayan, at diwa ng komunidad.
Nakasentro ang tema na “Pamanang Lasa, Pamanang Pananampalataya,” at may apat na pangunahing bahagi: Lasa, Pamana, Likha, at Kabuhayan na nagpapakita ng pagkain, pananampalataya, sining, at lokal na negosyo.
Ilulunsad din ni Mayor Joy Belmonte ang La Loma Gastronomic Map na magtatampok sa mga pangunahing kainan sa lugar at magpapalakas sa reputasyon nito bilang culinary hub ng QC.
Ayon kay Mayor Belmonte, “The La Loma Lechon Festival is more than a food celebration. It reflects the heart of Quezon City — where culture, community, faith, and livelihood come together,” at “When we celebrate La Loma, we also support our local businesses, tourism workers, artists, and lechoneros who keep this tradition alive for generations.”
Magtatapos ang festival sa fireworks display bilang huling bahagi ng buong araw na selebrasyon ng kultura, pagkain, at komunidad. Invited ang QCitizens at bisita sa Mayo 17 sa La Loma, Quezon City. DANNY QUERUBIN
