MANILA, Philippines – Nilinaw ni Senate President Pro Tempore Panfilo “Ping” Lacson nitong Martes, Disyembre 23, na ang mga senador na nahalal sa May midterm elections ay hindi maaaring mapasama sa listahan ng budget insertions sa 2025 DPWH budget.
Ayon kay Lacson, ang mga rekord na binanggit ni Batangas 1st District Rep. Leandro Leviste, na diumano’y nagpapakita ng P120 bilyong DPWH insertions ng mga senador, ay tumutukoy sa badyet na inaprubahan pa ng 19th Congress, ilang buwan bago ang May polls.
“Congressman Leviste should at least qualify his statement with the phrase ‘in the 19th Congress’ in fairness to the new members of the 20th Congress, including myself and Senate President Vicente Sotto III, among others,” ani Lacson.
Dagdag niya, “even during the previous Congresses, I never partook of allocables or pork barrel allocations, or whatever names they were called.”
Bilang isa sa 12 senators na nahalal noong nakaraang Mayo, ipinaliwanag ni Lacson na hindi siya maaaring nakilahok sa paghahanda ng pambansang badyet para sa 2025, lalo na sa DPWH.
Sa isang radio interview noong Lunes, sinabi ni Leviste na may P120 bilyong insertions sa 2025 budget ng DPWH batay sa dokumento mula sa yumaong DPWH Undersecretary Ma. Catalina Cabral. Binanggit din niya na ang kanyang ina, Senator Loren Legarda, ay nakalista sa mga proyekto, ngunit ayon sa kanya, wala siyang kaalaman sa mga proyekto sa ilalim ng kanyang pangalan. RNT/MND
