MANILA, Philippines – Sinabi ni Senador Panfilo “Ping” Lacson noong Sabado na wala siyang nakikitang banta sa liderato ni Senate President Vicente “Tito” Sotto III kahit pa magkaroon ng impeachment trial laban kay Vice President Sara Duterte.
Ayon kay Lacson, nananatiling matatag ang majority bloc ng Senado, na kinabibilangan nina Sotto, Lacson, Senate Majority Leader Migz Zubiri, at mga senador na sina Bam Aquino, Pia Cayetano, Risa Hontiveros, Kiko Pangilinan, Mark Villar, Camille Villar, JV Ejercito, Lito Lapid, Win Gatchalian, Erwin Tulfo, at Raffy Tulfo.
“Impeachment trial or no impeachment trial, there’s always the possibility of an attempt at leadership change. That will not go away. Such plots are usually hatched during session breaks,” ani Lacson.
“At least to my knowledge, the majority bloc is solid because Senate President Sotto is leading well,” dagdag niya.
Ayon kay Lacson, pinag-aaralan nila ni Sotto ang Rules of Court at Revised Rules on Criminal Procedure bilang paghahanda sakaling matuloy ang impeachment trial.
Ibinahagi rin niya na pinayuhan niya si Sotto na maghanda sa posibleng hakbang ni Senador Rodante Marcoleta, isang kilalang alyado ni Duterte, na maaaring kumontra sa impeachment trial.
“The answer to Marcoleta’s threat lies in one word: Constitution,” aniya.
Giit niya, tungkulin ng mga senador na magsilbing senator-judges sa impeachment trial bilang mandato ng Konstitusyon.
Sa ngayon, ipinagpapatuloy ng House of Representatives of the Philippines ang pagdinig sa mga reklamo laban kay Duterte, na nilinaw ng justice committee na hindi pa ito trial kundi hearing pa lamang para linawin ang mga alegasyon. RNT/MND
