MANILA, Philippines – Ayon sa Department of Public Works and Highways (DPWH), sisimulan ngayong taon ang rekonstruksiyon ng Basco Central School sa Batanes, isang heritage school na nasunog noong Marso 2025.
Sinabi ni DPWH Secretary Vince Dizon sa kanyang pagbisita sa probinsya na mahalaga ang paaralan sa kasaysayan, ngunit nananatili itong wasak nang mahigit isang taon na.
“This is a heritage school, very historically significant. But what’s really sad is that it’s been like this for more than a year,” aniya.
Dagdag pa niya, “So, we have committed to the Governor (Ronald Aguto Jr.) and to our teachers that we will begin the reconstruction of our school here in Basco.”
Sa kasalukuyan, 635 estudyante ang gumagamit ng mga pansamantalang silid-aralan na hindi angkop sa pag-aaral.
Iniulat din ni Dizon na iniutos ni Pangulong Ferdinand Marcos Jr. ang pagtutulungan ng DPWH at Department of Education (DepEd) sa pamumuno ni Secretary Sonny Angara upang tugunan ang kakulangan ng mga silid-aralan sa buong bansa.
Noong Huwebes, lumagda ang DPWH at DepEd ng memorandum of agreement para sa Basic Education Facilities Program para sa Fiscal Year 2026. Layunin nito na mapabilis ang pagtatayo ng mga paaralan at masiguro ang transparency at accountability.
“We will speed up the works, and next year, it will be completed,” ani Dizon. RNT/MND
