MANILA, Philippines – Swak sa selda ang isang lalaki matapos itong makuhanan ng video na gumagamit ng ipinagbabawal na droga habang may kargang bata, napaulat kahapon sa Navotas City.
Batay sa report na nakarating sa tanggapan ni Police Captain Gregorio Cueto, deputy Chief ng Drug Enforcement Unit (DEU) ng Navotas-PNP, ang pagkakaaresto sa suspek ay nag-ugat base sa videong ipinadala ng kaanak ng naarestong nakilala lamang sa alyas “Ben”, nasa hustong gulang.
Tumangging magpakilala ang babaeng nag-aalala sa kanyang kaligtasan, subalit pilit na isinumite nito ang nakuhanan niyang video habang gumagamit ng shabu ang suspek at karga-karga ang isang bata.
Hinamon pa diumano ng naarestong suspek ang babae na papatayin at nagbanang lalaban sa mga pulis.
“Pati po kalusugan noong murang edad na bata ay napapahamak. Mate-take po ng batang iyon ang shabu dahil yung usok… halos maliit lang din po yung lugar,” pahayag ni Pol/Capt Cueto.
Labis din umano ang nararamdamang takot ng mga kaanak ng suspek dahil pinagbabawalan nila ito sa maling aktibidad.
Nagbanta pa umano ang suspek na sila ay papatayin kapag siya ay naka droga na.
Dahil ditto, ikinasa ang isang buy-busst operation at doon naaresto ang suspek.
Inamin naman nito ang nilalaman ng naturang video
“Ifo-focus ko nalang po yung ano ko sa pamilya ko, ma’am. Narealize ko na mali po pala yung ginagawa ko,” ani suspek.
Samantala, isa pa ring drug suspek na nakilala naman sa alyas “Tolits” ang inaresto sa Navotas hinggil din sa pagbebenta ng droga.
Kapwa naman itinanggi ng dalawa na nagtutulak sila ng droga at sa halip ay umaming gumagamit lamang diumano sila at hindi nagbebenta. “Gumagamit po ako pero ‘di po ako nagtutulak,” pahayag ng suspek.
“Dati po sangkot po ako sa pagbebenta ng droga , mga 2019 pa po,” dagdag pa nito. (Merly Duero)
