MANILA, Philippines- Arestado ang isang 49-anyos na lalaki ng mga miyembro ng Pasay City Police Substation dahil sa pag-atake sa isang Metro Manila Development Authority (MMDA) traffic aide sa pagsasagawa ng clearing operation nitong Miyerkules.
Kinillala ng Southern Police District (SPD) ang suspek na si “Jong” na nadakip sa kahabaan ng Advincula Street at FB Harrison Street sa Pasay City.
Base sa mga pulis, nagsasagawa ang Pasay Police Substation 2 officers ng clearing operation nang atakihin ng suspek ang 62-anyos na biktima. Ilang beses umanong sinuntok ni Jong ang enforcer sa ulo at bibig.
Agad nagsumbong ang mga saksi sa kapulisan at narekober pa ang P1,360 halaga ng shabu sa suspek.
Kinasuhan na si Jong ng indirect assault at illegal possession of drugs. RNT/SA
