MANILA — Libu-libong trabaho ang naghihintay sa mga Pilipino sa Romania, kung saan ang bansa ay nangangako ng mas mataas na suweldo kumpara sa ibang mga bansa.
Ito ang pahayag ni Raduta Dana Matache, Romanian Ambassador to the Philippines, sa paglulunsad ng unang Philippines-Romania Friendship Week kasama ang Department of Migrant Workers (DMW).
Ang bansa sa Europa ay nangangailangan ng mga driver ng trak, manggagawa sa pabrika, tagapag-alaga, at empleyado sa sektor ng manufacturing, bukod sa iba pa.
Ayon kay Matache, ang karaniwang buwanang suweldo ay 900 euros o higit sa P54,000 plus benefits gaya ng healthcare.
“The most important advantage for Filipinos who are family oriented and who go outside to work in order to sustain their families is the fact that the disposable income in Romania is higher than in many other places. I would say most other places. Why? Because the cost of living is reasonable in Romania,” dagdag niya.
Sa kasalukuyan ay may mahigit 2,000 Pilipinong migrante sa Romania na karamihan ay mga skilled worker. Noong 2023, nag-remit sila ng $429,000 o P24 milyon, ayon sa DMW.
Sinabi ng Officer-in-Charge ng ahensya na si Undersecretary Hans Leo Cacdac, pagbubutihin nila ang memorandum of understanding sa pagitan ng Pilipinas at Romania.
Sa kabila ng pagiging malapit ng Romania sa Ukraine at Israel na parehong nasasangkot sa kanilang sariling mga tunggalian, tiniyak ni Matache ang kaligtasan ng mga Pilipino.
“Ang Romania kapag nakatira ka doon ay matatag, ligtas. Ang Romania ay miyembro ng European Union at ng NATO (North Atlantic Treaty Organization). Bilang mga miyembro ng NATO sa loob ng 20 taon, nararamdaman namin na mayroon kaming proteksyon na payong ng iba pang mga estado ng miyembro ng NATO,” sabi niya.
Ang Pilipinas at Romania ay may 52 taong relasyong diplomatiko. RNT
