MANILA, Philippines – Pinapaprayoridad ni Land Transportation Office (LTO) Chief Assistant Secretary Vigor D. Mendoza sa lahat ng Regional Directors at District Office heads ang mga kababaihan sa pagsasagawa ng libreng Theoretical Driving Course (TDC) seminars ngayong buwan bilang bahagi ng patuloy na outreach program ng ahensya sa buong bansa.
Ayon kay Mendoza ang hakbang ay alinsunod sa tagubilin ni Department of Transportation Secretary Jaime J. Bautista na bumuo ng mga programa at aktibidad na magpaparangal sa kababaihan ngayong buwan, na idineklara bilang National Women’s Month.
“Ito ang paraan ng LTO para kilalanin ang papel ng kababaihang Pilipino sa lipunan, lalo na bilang katuwang ng gobyerno sa pagtiyak ng kaligtasan ng lahat ng gumagamit ng kalsada,” ani Mendoza.
Noong nakaraang linggo, dumalo si Assec Mendoza sa isang seremonya sa Naga City kung saan nilagdaan ang isang memorandum of agreement sa pagitan ng LTO at ng local government unit (LGU) para sa interconnectivity sa Single Ticketing System.
“Sa iisang pananaw na palakasin ang mga pagsusumikap sa pagpapatupad ng trapiko ng Lungsod ng Naga, binibigyang-diin ng sama-samang pagsisikap na ito ang kahalagahan ng tuluy-tuloy na koneksyon at pakikipagtulungan sa pagitan ng mga ahensya ng gobyerno, na tinitiyak ang kaginhawahan para sa lahat,” sabi ni Assec Mendoza.
Sa parehong aktibidad, iginawad ng LTO at ng LGU Naga City ang Scholarship Certificates for Theoretical Driving Course for Women para markahan ang International Women’s Day noong Marso 8.
Ang libreng TDC ng LTO ay isang outreach program ng LTO para sanayin ang maraming motorista tungkol sa kaligtasan sa kalsada.
Ang programa ay nagbibigay daan para sa mga aplikante ng lisensya sa pagmamaneho na makatipid ng hindi bababa sa P1,000, ang normal na singil para sa TDC sa mga driving school. Santi Celario
