MANILA, Philippines- Hinikayat ng Land Transportation Office (LTO) ang mga motoristang hindi pa nakukuha ang kanilang plastic-printed driver’s license na gamitin ang “Aksyon on the Spot 09292920865” nito para mas mabilis maimprenta ang kanilang mga lisensya.
Inatasan ni LTO Chief Vigor D. Mendoza II ang mga hindi pa nakakukuha ng plastic-printed driver’s licenses na i-scan o kunan ng larawan ang kanilang paper-printed licenses at ipadala ang imahe sa Viber platform gamit ang “Aksyon on the Spot” number 09292920865.
Sinabi ni Mendoza na agad na iiimprenta ng LTO ang mga lisensya sa Central Office at mag-aalok ng opsyong ipadala ito sa pamamagitan ng accredited courier service.
Makikita sa datos ng LTO na 5 porsyento lamang ng mga apektado ng backlog ang hindi pa nakukuha ang kanilang plastic-printed licenses.
Dahil dito, umapela si Mendoza sa natitirang porsyento na gamitin ang bagong serbisyo upang kunin ang kanilang lisensya.
“We have already dispatched a sufficient supply of plastic cards to licensing offices across the country. Therefore, all motorists should now have their plastic-printed driver’s licenses as the backlog has been cleared,” wika ni Mendoza. RNT/SA
