ZAMBALES, Philippines – Isang magnitude 4.6 na lindol ang tumama sa karagatan sa tapat ng Palauig, Zambales madaling-araw ng Linggo, Disyembre 28, ayon sa Philippine Institute of Volcanology and Seismology (PHIVOLCS).
Wala namang inaasahang pinsala at aftershocks.
Ayon sa PHIVOLCS, naganap ang lindol alas-2:26 ng umaga at may tectonic na pinagmulan.
Ang epicenter ay nasa 15.48°N, 119.85°E, humigit-kumulang 9 kilometro hilagang-hilagangkanluran ng Palauig, Zambales, at may lalim na 30 kilometro.
Naramdaman ang Intensity III sa Masinloc, Iba, at Botolan sa Zambales, habang Intensity II naman sa Quezon City.
Batay sa instrumental records, naitala rin ang Intensity II sa Guagua, Pampanga, at Intensity I sa San Marcelino, Zambales; Calumpit, Bulacan; Rizal, Nueva Ecija; Santa Ignacia, Tarlac; at sa mga lungsod ng Navotas at Malabon.
Tiniyak ng PHIVOLCS na hindi inaasahang magdudulot ng pinsala ang lindol at malabong magkaroon ng aftershocks. RNT/MND
