MANILA, Philippines – Ayon sa Philippine Atmospheric, Geophysical and Astronomical Services Administration (PAGASA), magpapatuloy ang karaniwang maaliwalas na panahon sa karamihan ng bansa, kabilang ang Metro Manila, ngunit may posibilidad ng mga panaka-nakang pag-ulan o pagkulog-pagkidlat.
Sa 4 a.m. advisory nitong Linggo, sinabi ng PAGASA na may ridge ng high-pressure area na umaabot sa Northern Luzon, kaya’t inaasahan ang bahagyang maulap hanggang maulap na kalangitan sa buong bansa.
Gayunpaman, maaari pa ring magdulot ang localized thunderstorms ng biglaang buhos ng ulan na posibleng magresulta sa flash floods o landslides, lalo na kapag malakas ang sama ng panahon. Pinapayuhan ang publiko na manatiling alerto sa posibleng thunderstorms sa hapon o gabi kahit na generally fair ang panahon.
Samantala, nananatili sa labas ng Philippine Area of Responsibility (PAR) ang Severe Tropical Storm Sinlaku at hindi inaasahang direktang makaaapekto sa bansa.
Bandang 3 a.m., huling namataan ang bagyo sa layong humigit-kumulang 2,770 kilometro silangan-hilagang-silangan ng Extreme Northern Luzon, na may lakas ng hangin na 95 kph at pagbugsong aabot sa 110 kph. Kumikilos ito pahilagang-silangan sa bilis na 25 kph.
Sa mga baybaying bahagi ng silangang Southern Luzon, Visayas, at Mindanao, inaasahan ang katamtamang alon na may taas na 1.5 hanggang 2.5 metro, habang banayad hanggang katamtaman naman sa ibang bahagi ng bansa.
Sa Northern at Central Luzon, mahina hanggang katamtaman ang hangin mula hilagang-silangan hanggang timog-silangan, habang sa natitirang bahagi ng bansa ay mula hilagang-silangan hanggang silangan.
Sa Metro Manila, umabot sa 35.1°C ang pinakamataas na temperatura noong Biyernes ng hapon at bumaba sa 23.8°C madaling-araw, batay sa monitoring ng PAGASA sa Science Garden station sa Quezon City. RNT/MND
