LEGAZPI CITY — Pinagbabaril at napatay nitong Miyerkules, Nobyembre 6, ng hindi pa nakikilalang mga suspek ang isang 65-anyos na lalaki at ang kanyang anak sa bayan ng Lupi sa Camarines Sur.
Sa ulat nitong Huwebes, Nobyembre 7, sinabi ng Lupi police habang nanonood ng telebisyon sa loob ng kanilang canteen, nilapitan si Desederio Longabela ng dalawang armadong lalaki at pinagbabaril ng ilang beses sa Barangay Colacling alas-6:10 ng gabi.
Matapos marinig ang putok ng baril, lumabas ang kanyang anak na si Bobby, 38, upang tingnan ang kanyang ama at binaril din ng maraming beses ng mga suspek.
Parehong nagtamo ng tama ng bala sa iba’t ibang bahagi ng katawan ang mga biktima. Namatay sila kaagad.
Isang inisyal na ulat ang nagsabi na si Bobby ay dating miyembro ng Civilian Armed Force Geographical Unit.
Iniimbestigahan pa ng pulisya ang posibleng pagkakakilanlan at pagkakadakip sa mga suspek. RNT
