MANILA, Philippines — Isang magnitude 5.0 na lindol ang tumama sa karagatang bahagi ng Burgos, Surigao del Norte nitong Miyerkules ng umaga, ayon sa Philippine Institute of Volcanology and Seismology (PHIVOLCS).
Naitala ang tectonic earthquake alas-8:39 ng umaga. Natukoy ang epicenter nito sa layong 34 kilometro hilagang-silangan ng Burgos at may lalim na 10 kilometro.
Naramdaman ang Intensity III sa San Francisco, Southern Leyte.
Naitala naman ang Intensity II sa Hinundayan, Pintuyan, Saint Bernard at Silago sa Southern Leyte, gayundin sa Surigao City, Surigao del Norte.
Naitala rin ang Instrumental Intensity III sa San Francisco, habang Instrumental Intensity II naman sa Surigao City, Hinundayan at Silago.
Instrumental Intensity I ang naitala sa Mahaplag at Abuyog, Leyte; San Juan, Southern Leyte; at San Fernando, Bukidnon.
Ayon sa PHIVOLCS, walang inaasahang pinsala ngunit posible ang mga aftershock. Santi Celario
