MANILA, Philippines – Iniulat ng Silliman University (SU) na ang wastewater spill sa Bais Bay ay nakapinsala sa 4,494 hanggang 6,000 ektarya ng dagat at baybaying tubig, na nagdulot ng localized fish kills hanggang 7 kilometro mula sa pinanggalingan ng spill.
Ang insidente ay sanhi ng pagbagsak ng wastewater lagoon ng Universal Robina Corporation (URC).
Sa Manjuyod, iniulat ng mga fish pen at seaweed farm operators ang pagkalugi mula PHP1,000 hanggang PHP1.8 milyon kada operator, na nagpapakita ng malawakang pinsala sa kabuhayan ng mga lokal.
“SU stands in solidarity with the affected communities and remains steadfast in its commitment to science-based environmental action, accountability, and ecological restoration,” ani ng unibersidad, na nananawagan ng agarang pagkukumpuni sa lagoon, transparent na monitoring ng tubig, at pagpapalakas ng koordinasyon sa iba’t ibang sektor.
Ang Tañon Strait Protected Seascape (TSPS), na sumasaklaw sa higit 500,000 ektarya sa pagitan ng Negros at Cebu, ay isa sa pinakamaraming biodiversity sa bansa at mahalagang pinagkukunan ng kabuhayan ng mga coastal families.
Ayon sa Department of Environment and Natural Resources (DENR), bumuo ng inter-agency task force upang imbestigahan ang sitwasyon, suriin ang kalidad ng tubig, at mangasiwa sa containment at repair operations ng URC. Ang spill ay naglabas ng malaking dami ng untreated molasses-based ethanol wastewater, na nagdulot ng oxygen depletion, algal blooms, at fish kills.
“The Department assures the public that all necessary measures are being taken to protect the environment, hold violators accountable, and restore affected areas,” dagdag ng DENR. Santi Celario
