MANILA, Philippines – Suportado ng Philippine National Police (PNP) ang panawagan para sa mas mahigpit na mga hakbang laban sa fake news at online disinformation, habang patuloy din nitong pinaigting ang monitoring sa cyberspace kasabay ng regulasyon sa social media.
Ito ay kaugnay ng inisyatiba ng Presidential Communications Office (PCO) at Department of Information and Communications Technology (DICT), na nagpadala ng liham sa Meta Platforms Inc., parent company ng Facebook, upang palakasin ang mga polisiya laban sa pekeng balita at iba pang mapaminsalang content.
Ayon sa PNP chief Gen. Jose Melencio Nartatez Jr., bagama’t may umiiral nang patakaran ang Facebook at iba pang platforms, hindi pa ito sapat dahil sa dami ng kumakalat na maling impormasyon araw-araw.
“The intervention of social media companies through tighter monitoring and stricter regulations is one big step to effectively address this problem. And we support the PCO and the DICT on this,” aniya.
Dagdag pa niya, batay sa karanasan ng PNP sa cybercrime cases, may ilang content creators na sadyang nagpapakalat ng maling impormasyon na inilalabas na parang lehitimong balita.
Giit ni Nartatez, ang fake news ay nakapagdudulot ng kaguluhan at maaari pang magpasiklab ng galit ng publiko.
Binigyang-diin din niya na hindi ganap ang kalayaan sa pagsasalita.
“There is no absolute freedom of expression. It always comes with a responsibility anchored on the basic rule that one must not step on the rights of others,” aniya.
“And once this responsibility is ignored, the rule of law must be observed,” dagdag niya.
Hinihikayat ng PNP ang publiko na iulat ang mga insidente, magsampa ng reklamo, at maging responsable sa pagbabahagi ng impormasyon online. RNT/MND
