MANILA, Philippines- Ipinanawagan ng mga senador ang mas malalim na imbestigasyon sa mga nasa likod ng paglipana ng pekeng birth certificates sa gitna ng daan-daang kaso sa Davao del Sur na iniulat ng National Bureau of Investigation (NBI).
“I think that is only the ‘tip of the iceberg’ so to speak. The NBI should investigate further and find the real and other culprits behind this,” pahayag ni Senate President Francis “Chiz” Escudero nitong Martes.
“I believe [the case of suspended Mayor Alice] Guo is not the first and will certainly not be the last to fake a birth certificate,” dagdag niya.
Tinukoy ni Senate Minority Leader Aquilino “Koko” Pimentel III ang ulat na “alarming” at inihirit ang “comprehensive investigation on what happened there.”
Sinabi naman ni Senator Risa Hontiveros, nangunguna sa imbestigasyon sa kaso ni Mayor Alice Guo na pineke umano ang kanyang birth certificate, na ang pagkakalantad ng libo-libong pekeng pagkakakilanlan ay “clear threat to public order and national security.”
“Tigilan na ang pagkakalakal sa ating pagka-Pilipino. Ang ating pagkakakilanlan o identity ay hindi pwedeng bilhin o ibenta…Our recent legislative inquiries into POGOs have already revealed that criminal groups use fake Filipino citizenship to carry out their illicit activities. We, at the Senate, will continue to look into this alarming trend,” giit ng senador.
“Somewhere out there, someone with a fake identity is trying to buy land, use Philippine passports to give himself or herself a brand new identity, form corporations, and perhaps even have the audacity to run for public office. This has been done before,” patuloy niya.
Kinuwestiyon naman ni Hontiveros kung sino ang kumukunsinti sa ganitong gawain at kung protektado ang mga indibidwal na nasa likod ng birth certificates.
“Sino ang mga nagkukunsinti nito? Sino ang mga kasabwat o protektor? Sa Davao del Sur lang ba ito nangyayari o sa buong Pilipinas? We must crack down on Filipinos who have made this possible,” aniya.
Sumang-ayon din si Senator Sherwin Gatchalian, nauna nang naghain ng resolusyon na nagtutulak ng imbestigasyon sa pekeng birth certificates sa gitna ng kaso ni Guo, na ang kaso sa Davao del Sur ay “ tip of the iceberg” lamang.
“For sure we are just looking at the tip. Malalim na problema ito,” pahayag niya sa isang panayam.
“We have to look at the personalities. Dahil itong birth certificate di na dumadaan sa mayor ito, local registrar pwede na siyang mag-isyu. Ganyan kapowerful ang local registrar,” dagdag niya.
Binanggit din niya ang iba pang kaso sa isa pang lalawigan sa Mindanao bukod sa Davao del Sur at sinabing ang mga aktibidad na ito ay ginagawa sa mga malalayong lugar dahil naniniwala ang mga tao sa likod nito na hindi sila mabibisto.
“Ang tingin ko dyan akala nila hindi madedetect, hindi makikita, dahil malayo nga at hindi mahahalata pero nakita natin ngayon na ang dami palang ganitong Alice Guo cases all over the country,” giit ng senador.
Para sa kanya, dapat imbestigahan ang late registration system upang ialerto ang Bureau of Immigration, NBI, at ang Department of Foreign Affairs sa pekeng birth certificates na inisyu.
Nagbukas na ng imbestigasyon ang Senate blue ribbon committee sa pekeng birth certificates at government IDs na inisyu, partikular sa foreign nationals.
Nauna nang sinabi ng ilang senador na sa tingin nila ay sindikato ang nasa likod ng ilegal na gawaing ito. RNT/SA
