MANILA, Philippines — Nakikita ng publiko ang mga pagbabago sa Philippine National Police (PNP) sa ilalim ng pamumuno ni PNP Chief Police General Jose Melencio C. Nartatez Jr., ayon sa pinakabagong nationwide governance survey na nagbigay sa kanya ng mataas na trust at performance ratings.
Batay sa survey, nakapagtala si Nartatez ng 78.8 porsiyentong Index of Governance score, dahilan upang mapasama siya sa hanay ng mga opisyal ng pamahalaan na may pinakamataas na antas ng tiwala mula sa mamamayan.
Ayon sa mga tagamasid, hindi lamang numero ang ipinakikita ng survey kundi ang pagkilala ng publiko sa mga repormang ipinatutupad sa loob ng pambansang pulisya.
Mula nang manungkulan bilang hepe ng PNP, nakatuon si Nartatez sa pagpapatibay ng disiplina sa hanay ng mga pulis, pagpapalakas ng police operations, pagpapalawak ng community policing, at pagpapaigting ng pananagutan sa loob ng organisasyon.
Bagama’t hindi agad napapansin ng publiko ang mga ganitong hakbang, sinasabing malaki ang naging epekto ng mga ito sa pagpapabuti ng serbisyo at pagpapanumbalik ng tiwala sa PNP.
Matatandaang ilang beses ding naharap sa mga kontrobersiya at hamon sa kredibilidad ang pambansang pulisya sa mga nakalipas na taon. Gayunman, unti-unti umanong nababawi ang kumpiyansa ng publiko sa pamamagitan ng mga konkretong resulta at mas maayos na pagpapatupad ng tungkulin.
Ipinakikita rin umano ng survey na nakikita ng mamamayan ang pagsisikap ng organisasyon na pairalin ang propesyonalismo, integridad, at malasakit sa serbisyo publiko sa ilalim ng kasalukuyang liderato.
Para sa maraming sektor, mahalagang salik ang mahusay na pagpapatupad ng batas sa pagpapanatili ng kapayapaan at kaayusan, na siyang nagsisilbing pundasyon ng pag-unlad ng mga komunidad at ng ekonomiya.
Gayunpaman, nananatiling hamon sa PNP ang pagpapanatili ng mataas na antas ng tiwala ng publiko sa pamamagitan ng tuluy-tuloy na reporma, integridad, at tapat na paglilingkod.
Sa huli, ipinakikita ng resulta ng survey na hindi lamang sa mga pahayag kundi sa aktuwal na pagganap sinusukat ng publiko ang pagiging epektibo ng isang lider. At para sa maraming Pilipino, nakikita nila ang mga pagbabagong isinusulong ni Chief Nartatez sa hanay ng pambansang pulisya. RNT
