Bulacan – Arestado ang isang 41 anyos na binatang karpintero na umano’y kargado ng baril habang pagala-gala sa lungsod San Jose Del Monte (SJDM).
Kinilala ang naarestong suspek na si Archie Valmonte, residente ng Towerville, Brgy. Gaya-Gaya.
Sa report ng SJDM police station, naganap ang insidente bandang 10:30 ng umaga nitong September 10 sa nasabing lugar.
Ayon sa report, isang tawag ang natanggap ng PCP 2 mula sa isang concerned citizen na may lalaking naka-sando, shorts at may dalang baril.
Dahil dito, rumesponde ang mga pulis sa lugar hanggang sa bumulaga sa kanila ng target na kargado ng baril kaya siya inaresto.
Nakumpiska ang Cal.38 at dalawang bala sa suspek na nahaharap sa kasong paglabag sa RA 10591 habang nakakulong sa naturang istasyon ng pulisya. Dick Mirasol III
