Marikina, Philippines – Dalawang magkasunod na dagok ang natanggap sa kampo ng mag-asawang Teodoro, matapos ang disqualification case, binulaga naman sila nitong Mayo 6 ng show cause order mula sa Commission on Elections – Committee on Kontra Bigay, dahil sa umano’y talamak na vote buying gamit ang ayuda at medical assistance sa Marikina.
Sa dokumentong may petsang 05 Mayo 2025, inilahad ng COMELEC ang natanggap nilang reklamo hinggil sa mga aktibidad ng vote-buying at pang-aabuso sa pondo ng gobyerno sa iba’t ibang barangay gaya ng Marikina Heights, Sto. Niño, Concepcion Uno, at iba pa mula Abril 28 hanggang Mayo 1.
Tinamaan ng show cause hindi lang si Maan Teodoro, kundi pati si suspended mayor at disqualified congressional candidate Marcy Teodoro, ayon mismo sa Comelec.
Nakasaad sa show cause order na “Payouts of P2,000.00 or claim stubs for the said amounts were distributed to attendees urging them to vote for you and your husband Marcy Teodoro in the upcoming elections.”
Sinasabing ginamit ang DSWD financial assistance at Medical Assistance Program upang mahikayat ang mga botante. Ilang insidente, mga supporter na nakasuot ng campaign shirts ang aktwal na namudmod ng pera.
Hindi rin nakalusot ang mismong presensya ni Cong. Maan Teodoro:
“You were reportedly present delivering a speech and campaigning for yourself and your husband…”
Dagdag pa sa ulat “People passing by were asked if they were voters of Marikina City and, if in the affirmative, were directed to line up to claim money in the form of medical assistance.”
Mariin namang iginiit ng Comelec na “The foregoing acts constitute possible violation of vote buying and/or abuse of state resources…” alinsunod sa Section 261 ng Omnibus Election Code. RNT
