MANILA, Philippines – Itinuring na isa sa pinakamapanganib na lungsod para sa mga dayuhang turista, ang kabisera ng Pilipinas na Maynila, ayon sa Forbes Advisor.
Niraranggo ng publikasyon ang Maynila bilang ika-limang pinakamapanganib na lungsod na may kabuuang iskor na 91.49.
Ika-9 ang kabisera ng Pilipinas sa panganib sa krimen, ika-5 sa panganib sa personal na seguridad, ika-7 sa panganib sa seguridad sa kalusugan, ika-9 sa panganib sa seguridad sa imprastraktura, at ika-12 sa panganib sa digital na seguridad, base pa sa Forbes Advisor.
Bukod sa Maynila, pasok ang Lagos, Nigeria (ikaapat); Yangon, Myanmar (ikatlo); at Karachi, Pakistan (pangalawa) sa nasabing listahan ng pinakamapanganib na syudad sa mundo para sa mga turista.
Samantala, natuklasan ng Forbes Advisor ang Caracas, Venezuela bilang ang pinakamapanganib na lungsod para sa mga turista, na sinasabing ito ang may pinakamataas na panganib sa seguridad sa kalusugan, pinakamataas na panganib sa krimen, at may pinakamasamang rating sa kaligtasan sa paglalakbay mula sa US State Department.
Samantala, ang Singapore ang pinakaligtas na lungsod para sa pagkakaroon ng pinakamahusay na travel safety rating mula sa US State Department at pinakamababang panganib sa natural na kalamidad.
Kabilang din ang Tokyo, Japan (pangalawa); Toronto, Canada (ikatlo); Sydney, Australia (ikaapat); at Zurich, Switzerland (ikalima) sa pinakaligtas na syudad sa buong mundo para sa mga turista.
Sinabi ng Forbes Advisor na inihambing nito ang 60 internasyonal na lungsod sa pitong pangunahing sukatan – kaligtasan sa paglalakbay, panganib sa krimen, panganib sa personal na seguridad, panganib sa seguridad sa kalusugan, panganib sa seguridad sa imprastraktura, panganib sa natural na sakuna, at panganib sa digital na seguridad – upang matukoy ang pinakamapanganib at pinakaligtas na mga lungsod para sa mga manlalakbay. RNT
