MANILA, Philippines – IPINAHAYAG ng Bureau of Immigration (BI) na kasama sa kanilang Immigration Lookout Bulletin (ILBO) ang mga pangalang Alice Guo at Guo Hua Ping.
Ang naturang pahayag ay sinabi ni BI spokesperson Dana Sandoval sa gitna ng mga ulat na maaaring umalis ng bansa ang sinuspinde na si Bamban, Tarlac Mayor Alice Guo gamit ang kanyang Chinese passport gaya ng sinabi ni Senator Sherwin Gatchalian.
Ang ILBO ay inisyu upang i-double check kung mayroong anumang nakabinbing warrant of arrest laban sa mga nasasakupan, o subaybayan ang kanilang mga itinerary at kung nasaan, sakaling subukan nilang umalis ng bansa.
Nauna rito, kinumpirma ng National Bureau of Investigation na ang suspendidong alkalde at si Guo Hua Ping ay iisang tao.
Matatandaan na si Guo ay inakusahang sangkot sa mga ilegal na Philippine Offshore Gaming Operation (POGO) hubs.
Si Guo, na kasalukuyang iniimbestigahan ang tunay na citizenship at pagkakakilanlan, ay inilagay sa ilalim ng anim na buwang preventive suspension na walang bayad ng Office of the Ombudsman noong Mayo 31 kasunod ng mga reklamong administratibo ng Department of the Interior and Local Government (DILG).
Nahaharap din siya sa isang pagsisiyasat ng Senate Committee on Women, Children, Family Relations, at Gender Equality. Jay Reyes
