MANILA, Philippines – Inaresto ng Philippine National Police Criminal Investigation and Detection Group (PNP-CIDG) ang incumbent mayor ng South Upi, Maguindanao del Sur at asawa nito dahil sa pagpatay sa vice mayor ng naturang bayan noong 2024.
Ang mga suspek ay kinilala lamang sa pangalang “Rey” at “Janet” na naaresto ng mga awtoridad sa Barangay Making sa Parang, Maguindanao del Norte kasunod ng arrest warrant dahil sa murder, frustrated murder, at attempted murder na inisyu ng regional trial court sa Cotabato City.
“After a tedious and in-depth investigation, in November 2024, the SITG filed criminal complaints for violation of Article 248 of Revised Penal Code – Murder, Frustrated Murder, and Attempted Murder against twelve accused including the Mayor and his wife for their alleged participation as alleged ‘masterminds’ in the planning and orchestration of the ambush,” saad sa pahayag ng PNP-CIDG nitong Miyerkules, Mayo 21.
Matatandaan na pinatay sa ambush si South Upi Vice Mayor Ronald Benito at isa sa kanyang mga security aide noong Agosto 2024.
Sakay ng pick-up truck si Benito, miyebro ng kanyang pamilya, at security detail sa Sitio Linao, Barangay Pandan nang sila ay atakehin.
Sugatan naman sa naturang pananambang ang asawa ni Benito na isang barangay chairperson, kanilang anak, at isa pang security escort. RNT/JGC
