MANILA, Philippines – Walang magbabago sa implementasyon ng Mutual Defense Treaty sa pagitan ng Pilipinas at Estados Unidos kahit na sinuman ang maluklok bilang bagong Pangulo ng US, ayon kay Philippine Ambassador to the US Jose Manuel “Babe” Romualdez nitong Lunes, Nobyembre 4.
“Yes, definitely. As I said, ‘yung defense establishment dito [here] is very much aligned with the way they want our lives to continue,” sagot ni Romualdez sa panayam ng DZBB.
“‘Yung [the] Visiting Forces Agreement nga has been there already for many, many years since 1993, 1994. At saka ‘yung ang ating [and our] EDCA, that’s been also around since 2016. ‘Yan tuloy tuloy ‘yang agreement na ‘yan [those agreements will continue] which we respect,” dagdag pa niya.
Ang MDT ay pinirmahan ng Manila at Washington noong 1951 na isang defense pact kung saan magtutulong ang dalawang bansa para depensahan ang isa’t isa sa panahon ng panggigipit.
Ani Romualdez, kung mananalo si Kamala Harris ay asahan ng mga Filipino ang kaparehong relasyon sa pagitan ng Pilipinas at US sa panahon ng administrasyon ni US President Joe Biden.
Ngunit kung makuha naman ni Donald Trump ang pwesto, maaaring may mga pagbabago sa economic front, ngunit wala pa ring magbabago sa defense ties sa pagitan ng US at Pilipinas.
“Kung makabalik siya sa White House, iiba siguro ‘yung relasyon natin as far as on the economic front dahil iba ‘yung policy ni former President Trump. But as far as defense relations natin, pareho pa rin dahil si administration ni Trump, ‘yung word na ‘ironclad commitment’ was coined,” paliwanag ni Romualdez. RNT/JGC
