MANILA, Philippines – Naibigay na sa legal team ang medical examination report ni dating Pangulong Rodrigo Duterte na isinagawa ng panel of experts na itinalaga ng Pre-Trial Chamber I para suriin ang kalusugan ng dating Pangulo na humarap sa paglilitis, ayon kay defense lead counsel Nicholas Kaufman.
“The Defense has been provided with the reports of the Court appointed panel of experts,” ani Kaufman sa mensahe nito sa ABSCBN nitong Sabado, Disyembre 6.
Sa kabila nito, confidential aniya ang laman ng medical reports at ang mga partido sa kaso ni Duterte “have been invited to make any observations on them” sa Disyembre 12.
Ang panel of doctors ay binigyan ng deadline noong Disyembre 5 para ipasa ang kanilang medical evaluation kay Duterte.
Binigyan naman ang depensa, prosekusyon at Office of the Public Counsel for Victims ng hanggang Disyembre 12 para ipasa ang kanilang mga obserbasyon.
Samantala, sinabi ni Vice President Sara Duterte na ngayon ay nasa The Hague, na ang kanyang pagbisita sa ama ay “okay.”
“Okay lang naman ‘yung bisita. It was a good day today,” ani VP Sara.
Inaasahang gagawin naman ang desisyon sa susunod na taon dahil magkakaroon ng break ang ICC mula Disyembre 12 hanggang Enero 5 ayon kay ICC Assistant to Counsel Kristina Conti.
“Kaya kung sa January sasabihin nila kunwari fit to stand trial, ise-set na nila ‘yung confirmation of charges hearing at sa earliest sa nakikita po natin, February posibleng mag-resume o mai-reschedule,” ani Conti. RNT/JGC
