MANILA, Philippines – Nagsimula nang maghanda ang ilang ahensya ng gobyerno para sa epekto ng Severe Tropical Storm Opong, na tinaya ng state weather bureau na magla-landfall sa Bicol Region sa Biyernes.
Ang Department of Health (DOH) ay nag-imbak ng mga mahahalagang kailangan sa kalusugan, kabilang ang mga pang-emerhensiyang suplay ng kalusugan, nutrisyon at sanitation kits, hygiene kit, at mental health kits para sa mga residente ng Western at Eastern Visayas.
Bumili rin ang DOH ng mga gamot, kabilang ang doxycycline para maiwasan ang bacterial infection, oral rehydration salts, at gamot para sa ubo, sipon, at lagnat.
Nakaalerto ang mga health emergency response team sa mga rehiyong iyon, dagdag ng DOH.
Samantala, hinimok ng Department of Energy (DOE) ang mga utility at operators na siyasatin ang mga linya ng kuryente at mga asset ng enerhiya bago ang Opong.
Sinabi ni Task Force on Energy Resilience Chair Felix William Fuentebella na dapat palakasin ng mga operator ang mga linya ng kuryente sa mga lugar na may mataas na peligro “to better withstand the impact of storms and minimize service disruptions.”
Gayunman, sinabi ng DOE na nagpapatuloy ang pagpapanumbalik ng trabaho sa mga lugar na tinamaan ng Super Typhoon Nando, kabilang ang pagkukumpuni sa Basco Diesel Power Plant sa Batanes, na nagtamo ng pinsala sa panahon ng bagyo.
Isang electric vehicle (EV) charging station ang nire-restore din sa La Union, at 14 na gasoline station sa buong Ilocos Region, Cagayan Valley, Central Luzon, at Cordillera Administrative Region ang mahigpit na binabantayan para sa supply.
Bukod pa rito, inihanda ng Department of Transportation (DOTr) ang lahat ng Port Management Offices (PMOs) ng Philippine Ports Authority (PPA) para sa epekto ng bagyo at habagat, na maaaring lumakas sa katapusan ng linggo.
Inihanda ng DOTr ang mga suplay sa pantalan tulad ng emergency power system, kagamitan sa komunikasyon, kagamitan sa first aid, at pagkain at tubig.
Nakatakda rin ang PPA na regular na maghatid ng impormasyon mula sa mga PMO tungkol sa mga kanseladong biyahe, mga stranded na pasahero, mga rolling cargo at barko, lagay ng panahon at dagat, at status ng daungan.
Bukod dito, tiniyak ng Department of Social Welfare and Development (DSWD) ang koordinasyon sa iba pang ahensya ng gobyerno para maghanda at tumugon sa TS Opong.
Ang DSWD ay nasa proseso pa rin ng pagtugon sa kalamidad, na nagbibigay ng mga food packs ng pamilya at tubig sa mga komunidad na naapektuhan ng mga nakaraang bagyong Mirasol at Nando. RNT/MND
