MANILA, Philippines – Sinabi ng pamahalaan na nais nitong palakasin ang mga pangunahing ahensya ng gobyerno at mga tagapagpatupad ng batas ang kanilang kooperasyon laban sa lumalalang banta ng iligal na kalakalan ng tabako sa gitna ng dumaraming pag-aalala sa paglaganap ng mga ipinagbabawal na produktong tabako at nicotine sa bansa at sa malaking pagkawala ng kita ng pamahalaan dulot nito.
Binigyang-diin ng mga awtoridad ang pangangailangan ng mas matibay na pagtutulungang panrehiyon upang matugunan ang suliraning may likas na katangiang tumatawid sa mga hangganan ng mga bansa.
Pangungunahan ng Department of Agriculture (DA) at National Tobacco Administration (NTA) ang pagdaraos ng Ikatlong International Tobacco Summit na may temang “Leveraging Growth, Securing Futures: Enhancing Livelihood and Revenue against Illicit Trade,” bilang pagpapatibay sa pangako ng Pilipinas, bilang Tagapangulo ng ASEAN, na itaas ang laban kontra iligal na kalakalan ng tabako bilang pangunahing prayoridad sa rehiyon.
Kaugnay nito ang summit, na gaganapin sa Hunyo 18 sa Marco Polo Ortigas Manila sa Pasig City, ay tututok sa pagtugon sa mga hamong pang-ekonomiya at pagkawala ng kita ng pamahalaan na dulot ng iligal na kalakalan ng tabako sa Pilipinas.
Batay sa kamakailang pag-aaral ng European Union–ASEAN Business Council (EU-ABC) at Euromonitor International, tinatayang nawalan ang Pilipinas ng humigit-kumulang P141 bilyon (katumbas ng $2.46 bilyon) na kita ng pamahalaan dahil sa iligal na kalakalan ng tabako mula 2024 hanggang 2025.
Nabatid na sa kabuuang halagang ito, humigit-kumulang P118.1 bilyon ang nawala dahil sa iligal na sigarilyo, habang P22.9 bilyon naman ang nawala dahil sa mga ipinagbabawal na produktong e-vapor.
Samantala ipinakita rin sa ulat na 85.6 porsiyento ng mga e-vape na ibinebenta sa Pilipinas ay iligal, na siyang pinakamataas na porsiyento ng mga ipinagbabawal na vape products sa mga bansang legal ang vaping sa Timog-Silangang Asya.
Bukod sa pagkawala ng kita ng pamahalaan, pinahihina rin ng iligal na kalakalan ng tabako ang lehitimong kabuhayan sa agrikultura, pinabababa ang pagsunod sa mga regulasyon, at sinisira ang patas na kompetisyon sa merkado.
“Hindi lamang ninanakaw ng iligal na kalakalan ng tabako ang kita ng pamahalaan—ninanakaw din nito ang kabuhayan, mga oportunidad, at kinabukasan ng ating mga komunidad na nagtatanim ng tabako. Ang summit na ito ay tungkol sa pagbubuklod ng pamahalaan at mga stakeholder sa iisang malinaw na mensahe: Poprotektahan natin ang mga lehitimong magsasaka, ipagtatanggol ang legal na kalakalan, at pananagutin ang mga sangkot sa iligal na operasyon,” ayon kay NTA Administrator at Chief Executive Officer Belinda Sanchez.
Inaasahang itatampok sa summit ang whole-of-government approach ng administrasyong Marcos sa pagprotekta sa kabuhayan ng humigit-kumulang 2.2 milyong magsasaka ng tabako, kanilang mga pamilya, manggagawa, at mga retailer na naaapektuhan ng smuggling at iligal na kalakalan.
Pagtitipunin ng summit ang mga opisyal ng pamahalaan, mga regulator, law enforcement agencies, mga stakeholder ng industriya, at mga internasyonal na eksperto upang magbahagi ng pinakamahuhusay na praktika at higit pang mapalakas ang sama-samang pagkilos laban sa iligal na kalakalan.
Tampok sa isang high-level panel discussion sina Interior Secretary Jonvic Remulla, Philippine National Police (PNP) Chief Gen. Jose Melencio Nartatez Jr., Bureau of Customs (BOC) Commissioner Ariel Nepomuceno, at Prosecutor General Richard Anthony Fadullon. Tatalakayin nila kung paano maisasalin ang pinaigting na operasyon laban sa iligal na kalakalan tungo sa matagumpay na pag-uusig at paghatol sa mga lumalabag sa batas. Santi Celario
