MANILA, Philippines – Inaasahang tatalakayin ng Pilipinas at South Korea ang mga isyu sa West Philippine Sea sa isang maritime dialogue na nakatakda sa susunod na linggo.
Kasabay ng National Day at Armed Forces Day ng Republic of Korea, inanunsyo ni South Korean Ambassador to the Philippines Lee Sang-Hwa ang ikalawang bugso ng maritime dialogue na sisentro sa mga isyu sa West Philippine Sea at South China Sea.
“We are expecting to cover a variety of issues ranging from protection of our maritime ecosystem, and safety and security in the West Philippine Sea and South China Sea, and you know, the Korea-Philippine military-to-military and defense industry cooperation,” ani Lee.
“I felt strongly that we should add our voice to the growing concern about the situation,” dagdag pa niya.
Kasunod ito ng sunod-sunod na mga isyu sa West Philippine Sea katulad ng pambobomba ng water cannon ng China sa mga barko ng Pilipinas na patungo sa Ayungin Shoal, at ang paglalagay ng floating barrier sa Scarborough Shoal.
Ang South Korea ay ka-alyado rin ng Estados Unidos at may malakas na alyansa sa Japan.
Nakipagkita si Lee kay Philippine Defense Secretary Gilberto Teodoro Jr., at US Ambassador to the Philippines MaryKay Carlson kasabay ng event.
Naroon din si Armed Forces chief General Romeo Brawner Jr. RNT/JGC
