MANILA, Philippines – Maagang dumagsa ang mga pasahero sa mga bus terminal upang makaiwas sa dagsa ng mga biyahero at makakuha ng tiket bago ang Undas.
Samantala, pinaigting ang seguridad sa Parañaque Integrated Terminal Exchange (PITX), kung saan iniinspeksiyon at ini-scan ang mga bagahe. Nag-deploy din ng mga K-9 unit upang suriin ang ilang bag.
Inaasahan ng PITX na aabot sa 1.8 milyon ang mga pasahero mula Oktubre 25 hanggang Nobyembre 4. Posible ring may mga magbiyahe sa mas mahabang weekend dahil sa ASEAN Summit sa Nobyembre 16 hanggang 18.
Maraming pasahero ang pumila sa mga ticketing booth upang bumili ng tiket o kunin ang kanilang boarding pass mula sa mga online booking. May ilan ding hindi nakabili dahil ubos na ang tiket para sa kanilang destinasyon.
Ayon sa PITX, mabilis mapuno ang ilang ruta ngunit may nakahandang karagdagang bus upang matugunan ang dami ng mga pasahero.
Samantala, hindi pa gaanong matao sa Araneta City Bus Port sa Cubao, Quezon City, bagama’t may ilang pasaherong piniling bumiyahe nang maaga.
Inaasahan din ng pamunuan ng Araneta City Bus Port ang pagdami ng mga pasahero sa mga susunod na araw at ang pagdagdag ng mga ruta, kabilang ang isang operator na inaasahang magbibigay ng biyahe patungong Bicol. RNT/MDS
