Mga ralyista, nagkagirian sa Ayala Bridge; 20 kabataan dinampot

MANILA, Philippines – Nagkaroon ng tensyon sa paanan ng Ayala Bridge sa Maynila matapos sunugin ng mga ralyista ang gulong ng isang nakaparadang container van at isang motorsiklong NMAX sa kasagsagan ng September 21 protest rally.

Hindi bababa sa 20 kabataang nakasuot ng itim na t-shirt at facemask ang inaresto ng Manila Police District (MPD) matapos maghagis ng bato at bote. Ilan sa mga pulis, bagamat armado ng shield, ay tinamaan din.

Karamihan sa mga ralyista ay nagsitakbuhan, habang ang iba ay nakorner at nadampot. Narekober mula sa ilan ang mga spray paint. Ayon sa MPD, papayagan ang mapayapang protesta ngunit hindi ang anumang karahasan.

Natigil ang kaguluhan nang bumuhos ang malakas na ulan. Ang mga inaresto ay dinala sa MPD headquarters.

Samantala, ang mga nagtipon sa Luneta ay nagmartsa patungong Mendiola upang ipagpatuloy ang kanilang programa. Jocelyn Tabangcura-Domenden