Mga suspek sa brutal na pagpatay sa 2 babae sa Zambales arestado sa Caloocan

MANILA, Philippines – Inanunsyo ng Police Regional Office 3 (PRO3) ang matagumpay na pag-aresto sa dalawang suspek sa brutal na pagpatay sa dalawang babae sa Palauig, Zambales, sa isinagawang hot pursuit operation na natapos sa Caloocan City.

Ang mga suspek, na kinilalang si alyas “Jinky,” 30, babae, walang trabaho, at alyas “Benedict,” 34, lalaki, mekaniko—kapwa residente ng Masinloc, Zambales—ay naaresto bandang 11:30 ng umaga nitong Sabado, Agosto 16, 2025, sa loob ng isang hotel sa Bagong Barrio, Caloocan City.

Ang pag-aresto sa kanila ay isinagawa ng magkasanib na elemento ng Zambales Police Provincial Office (ZPPO) Provincial Drug Enforcement Unit, Caloocan City Police Station, PIT-Zambales, mga operatiba mula sa PRO3 at PNP Intelligence Group.

Nag-ugat ang operasyon sa double murder incident na naganap noong Agosto 14, 2025, sa Purok 5, Brgy. Salaza, Palauig, Zambales.

Nabatid sa mga salaysay ng mga saksi na dakong alas-3:00 ng madaling araw nang marinig ang isang humaharurot na sasakyan sa lugar na sinundan ng putok ng baril.

Makalipas ang ilang oras, natagpuan ang bangkay ng dalawang babaeng biktima sa isang kanal na kinilalang si alyas “Khang-Khang,” ng Brgy. Tal-Tal, Masinloc, Zambales, at isa pang babaeng kilala lang bilang “Leng-Leng.”

Pinoproseso ng Scene of the Crime Operatives (SOCO) ang lugar at narekober ang maraming ebidensya kabilang ang limang basyo ng bala ng kalibre .45, mga sachet na hinihinalang naglalaman ng ilegal na droga, personal accessories, at cash.

Agad na ikinasa ang hot pursuit operation matapos lumabas ang mga ulat na tumakas ang mga suspek sakay ng isang itim na Subaru vehicle na may plate number na NVO 573 patungong Metro Manila.

Sa tulong ng pamunuan ng PRO3, naglabas ng flash alarm, at kalaunan ay natunton ng CCTV monitoring ang sasakyan sa nasabing hotel sa Caloocan.

Bandang alas-11:20 ng umaga ng Agosto 16, unang namataan at inaresto si alyas “Jinky” pagkatapos lumabas sa kanyang silid para bumili ng sigarilyo, na humantong sa pagkakahuli sa kanyang kinakasama na si alyas “Benedict” sa Room 131.

Nasamsam sa operasyon ang isang kalibre .38 na revolver at ang sasakyang ginamit sa pagtakas.

Ang parehong mga suspek ay ipinaalam sa kanilang mga karapatan sa konstitusyon at sumailalim sa medikal na pagsusuri. Nasa kustodiya na sila ng pulisya habang hinihintay ang pagsasampa ng kaukulang kaso.

Pinuri ni PRO3 Regional Director PBGEN Ponce Rogelio I. Peñones Jr. ang mabilis na koordinasyon ng mga operating unit at binigyang diin ang pangako ng PRO3 sa kaligtasan ng publiko.

“Ang pagdakip na ito ay naging posible sa pamamagitan ng sama-samang pagsisikap ng ating mga operatiba sa lupa. Ito ay nagpapakita ng ating pagkakaisa ng layunin at determinasyon upang matiyak na ang mga kriminal ay hindi makakatakas sa hustisya. Makatitiyak ka, ang PRO3 ay nananatiling matatag sa kanyang misyon na protektahan ang mga mamamayan ng Central Luzon at mapanatili ang kapayapaan sa ating mga komunidad,” sabi ni PBGEN Peñones Jr. RNT

Larawan kuha nina Val Leonardo at Jojo Rabulan