MANILA, Philippines – Inimbitahan ng Department of Health (DOH) noong Lunes, Hulyo 15, ang mga “mukbang” content creator para sa isang “open consultation.”
Sa ceremonial signing ng “National Policy on Promotion and Protection of Health in Jails, Prisons, Custodial Facilities, and Other Places of Detention,” sinabi ni DOH Assistant Secretary Albert Domingo na nagpahayag ng kagustohan si Health Secretary Ted Herbosa na makipagpulong sa mga “mukbangers,” isang termino na tipikal na ginagamit para sa content creators na gumagawa ng mukhang videos.
“We can say that this is an open consultation,” sabi ni Domingo.
Sinabi ni Domingo na ang mga mukbang content creators ay handang sumunod sa batas. Mayroon din aniya silang input kung saan ang DOH ay bukas para rito.
“So, if you’re watching, our office is open. Our staff will get in touch with you. Let’s have a meeting,” anunsyo ni Domingo para sa mga “mukbang” content creators.
Samantala, binigyang-diin ni Domingo na hindi sila agad magpapatupad ng pagbabawal sa ganitong uri ng content, ngunit may patuloy na talakayan at pagsasaalang-alang hinggil sa regulasyon.
Ayon sa Oxford Dictionary, ang “mukbang” ay isang video, lalo na ang isa na live-stream, na nagtatampok ng isang tao na kumakain ng maraming pagkain at nakikipag-usap sa madla.
Madalas itong kinabibilangan ng mga elemento ng autonomous sensory meridian response (ASMR) habang kumakain.
Nakakuha ito ng atensyon ng publiko, lalo na noong Hunyo, matapos ang mukbang vlogger na si “Dongz Apatan,” na mayroong mahigit 400,000 followers sa Facebook, ay na-stroke noong Hunyo 14 matapos kumain ng fried chicken, na humantong sa kanyang kamatayan.
Gayunpaman, ang DOH ay patuloy na nagpapalaki ng kamalayan ng publiko, partikular na nagbabala tungkol sa mga panganib ng hindi malusog na diyeta at labis na pagkain o overeating na maaaring humantong sa iba’t ibang mga sakit.(Jocelyn Tabangcura-Domenden)
