MANILA, Philippines – Hiniling ng mga kritiko sa pagsasapribado ng Ninoy Aquino International Airport (NAIA) sa Independent Commission for Infrastructure (ICI) na imbestigahan din ang kasunduan sa konsesyon para sa pangunahing gateway ng bansa.
Hinimok ng grupo ng mga manggagawa at stakeholder ng NAIA ang ICI nitong Martes na tingnan ang Public-Private Partnership (PPP) deal sa pagitan ng Department of Transportation (DOTr), Manila International Airport Authority (MIAA), at New NAIA Infrastructure Corporation (NNIC) na pinamumunuan ng San Miguel.
Ayon sa grupong PUSO ng NAIA ang kasunduan ay mayroong “serious lapses in public consultation, disclosure, and regulatory oversight.” Ayon pa sa grupo, “the project may have been pushed through without genuine public participation or accountability.”
Sa unang bahagi ng taong ito, hinikayat ng PUSO ng NAIA, kasama ang iba pang grupo at indibidwal, ang Korte Suprema na ideklarang labag sa konstitusyon ang nasabing kontrata ng konsesyon.
Sinabi nila na ang kasunduan sa PPP ay naglalaman ng “red flags” tulad ng pagpapahintulot sa koleksyon ng mga bayarin nang walang tamang konsultasyon at pag-apruba mula sa Kongreso.
Nanawagan ang grupo sa ICI na imbestigahan ang mga sangkot na opisyal para sa mga posibleng paglabag sa Anti-Graft and Corrupt Practices Act at suriin ang legalidad ng “non-regulated fees.”
“The ICI must move for a full review of the agreement to determine whether legal safeguards for consultation, disclosure, and oversight were deliberately bypassed,” saad ng grupo.
“The modernization of NAIA is vital and long overdue, but it must not be achieved through opaque and compromised arrangements. The airport belongs to the Filipino people—its rehabilitation should embody transparency, accountability, and public benefit, not private enrichment. We trust that the ICI will act decisively and independently to protect the public interest and uphold public good,” dagdag nito.
Sa naunang panayam, nanindigan si dating DOTr Secretary Vince Dizon na transparent ang concession deal sa NAIA at ginagabayan ng Asian Development Bank.
Sinabi rin ni Dizon na bumuti ang serbisyo sa paliparan mula nang pumalit ang NNIC. RNT/MND
