MANILA, Philippines – Arestado ang isang umano’y notoryus na holdaper nang makorner ng mga humabol na kalalakihan makaraang biktimahin ang isang “promdi” sa Malabon City, Linggo ng madaling araw, Hunyo 29.
Nakapiit ngayon sa custodial facility unit ng Malabon police ang suspek na si alyas “Anthony”, 37, residente ng Panday Pira St. Brgy. Bagong Barrio, Caloocan City na positibong kinilala ng biktimang si Bernard Danian, 20, ng Brgy. Lambingi, Bunga, South Cotabato.
Batay sa ulat, pauwi na sa tinutuluyan niyang bahay galing sa kanyang trabaho bilang helper ang biktima at habang naglalakad sa kahabaan ng McArthur Highway dakong alas-4:30 ng madaling araw nang tutukan ng patalim ng suspek pagdating sa kanto ng Inda Maria St., Brgy. Potrero sabay nagdeklara ng holdap.
Sa pangamba sa kaligtasan, hindi na pumalag ang biktima nang puwersahang kinuha ng suspek ang kanyang cellphone bago nagmadaling tumakas patungong Avocado Street.
Nagsisigaw naman na humingi ng tulong ang biktima na nakatawag pansin sa mga bystander sa lugar na agad humabol sa suspek hanggang masukol nila ito sa isang basketball court sa lugar.
Nakumpiska ng rumespondeng mga tauhan ng Malabon Police Sub-Station 1 sa suspek ang tinangay na cellphone ng biktima na nagkakahalaga ng P7,000.00 at ginamit sa panghoholdap na patalim. Merly Duero
