Navotas, nagpapatupad ng Solar at Energy Efficiency Program sa pampublikong gusali

NAVOTAS — Nagsasagawa ang Pamahalaang Lungsod ng Navotas ng mga hakbang upang mapabuti ang energy efficiency at mapababa ang gastos sa kuryente sa mga pampublikong gusali, sa pakikipagtulungan sa Department of Energy (DOE) sa ilalim ng programang “Solar Solutions for Government: Energy Efficiency at Renewable Energy in Public Buildings.”

Ayon kay Mayor John Rey Tiangco, makakatulong ang proyekto sa pagbuo ng mas matipid at responsableng lokal na pamahalaan. “Every peso we save on electricity is a peso we can redirect to services that truly matter to our people,” ani Tiangco.

Sa ilalim ng programa, ipatutupad ng Navotas ang mga teknolohiyang matipid sa enerhiya tulad ng LED lighting, inverter-type air-conditioning units, smart metering systems, solar PV installations, at electric vehicle charging infrastructure. Sinusuportahan nito ang Government Energy Management Program (GEMP) na nagtatakda ng pagbawas ng hindi bababa sa 10% sa konsumo ng kuryente at gasolina.

Ang DOE ay magbibigay ng teknikal na tulong, energy audit, at mangangasiwa sa pag-install ng renewable at energy-efficient systems. Samantala, ang lungsod ang tutukoy sa mga site, magsasagawa ng survey, at maghahanda ng Local Energy Efficiency and Conservation Plan.

Kasama sa kasalukuyan ang siyam na solar-powered na pasilidad sa lungsod, kabilang ang walong multi-purpose buildings at ang Navotas Polytechnic College, at nakaplano rin ang paglalagay ng solar panels sa Navotas Convention Center at Sports Complex.

“Hangad nating maging modelo ang Navotas sa paggamit ng malinis na enerhiya. This partnership brings us closer to that goal,” dagdag ni Tiangco. Tatakbo ang programa sa loob ng limang taon sa pamamagitan ng isang Technical Working Group upang matiyak ang maayos na pagpapatupad.