MANILA, Philippines- Ilalagay ang National Capital Region Police Office (NCRPO) sa ilalim ng full alert status simula sa Linggo bilang bahagi ng security measures para sa ikatlong State of the Nation Address (SONA) ni Pangulong Ferdinand R. Marcos Jr.
Nangangahulugan ang full alert ng pinakamataas na lebel ng kahandaan sa lahat ng police officers at units. Sa ilalim ng full alert status, hindi maaaring mag-leave ang isang pulis.
“We are on heightened alert such that on Sunday, we will be on full alert. As of now, threat level ang Metro Manila pinakamababa, halos walang threat. Around House of Representatives is no fly zone,“ pahayag ni NCRPO chief Maj. Gen. Jose Melencio Nartatez Jr. sa sidelines ng send-off ceremony para sa mga ide-deploy na pulis, na ginanap sa Quezon City Police District (QCPD) headquarters Camp Karingal.
Ani Nartatez, magdaragdag ng 1,000 pulis mula sa Central Luzon at Calabarzon na magdadala sa kabuuang bilang ng mga pulis na itatalaga para magbantay sa SONA sa 23,000.
Samantala, sinabi ng opisyal na inaasahan nila ang 8,000 hanggang 10,000 raliyista.
“We are ensuring that the delivery of the SONA of our President will be seamless, smooth and very peaceful. So hindi natin masasabing overacting or overkill,” giit niya.
Inilahad pa ni Nartatez na epektibo ang gun ban sa Metro Manila ngayong Sabado hanggang pagtatapos ng araw ng Lunes.
Tiniyak naman ni PNP chief Gen. Rommel Francisco Marbil sa publiko na handa ang PNP sa pagpigil sa anumang katulad na assassination attempt kay dating US president Donald Trump.
“Always 100 percent (ready). Remember it’s the whole organization, law enforcement,” ani Marbil sa isang panayam nitong Huwebes sa kanyang command visit sa Police Regional Office 4A in Laguna.
Nakikipag-ugnayan umano ang PNP sa Presidential Security Group (PSG), militar, National Bureau of Investigation (NBI), ar Metropolitan Manila Development Authority (MMDA), sa pagbabantay sa SONA.
Hinikayat din niya ang mga raliyista na panatilihing mapayapa ang kilos-protesta at huwag abalahin ang publiko.
Tinututukan ng PNP ang security measures sa bisinidad ng Batasang Pambansa Complex dahil ang House of Representatives Office ng Sergeant at Arms at ang PSG ang nangangasiwa sa seguridad sa loob.
Samantala, inilahad ng Armed Forces of the Philippines (AFP) na magde-deploy ito ng 500 tauhan at dalawang armored vehicles bilang suporta sa kapulisan. RNT/SA
