NPC pinasalamatan ng PUP sa wheelchair donation

MANILA, Philippines – PINASALAMATAN at kinilala ng Politeknikong Unibersidad ng Pilipinas ang mga opisyal ng National Press Club of the Philippines sa donasyon nitong mga wheelchair, sa isinagawang flag raising ceremony kasabay ng pagdiriwang ng Buwan ng Wika, nitong Lunes sa PUP Mabini Campus, Sta. Mesa, Manila.

Personal na tinanggap nina NPC President Leonel Abasola at Auditor Lydia Bueno ang sertipiko ng pagkilala mula sa mga opisyal ng PUP sa pangunguna ni President Dr. Manuel M. Muhi, bilang pasasalamat sa ipinagkaloob ng NPC at JTI International Philippines, Inc., na mga wheelchair sa naturang unibersidad.

Ang naturang hakbang ay naisakatuparan sa tulong ng Unyon ng mga Guro sa PUP at Kagawaran ng Filipinolohiya.

Kaugnay nito, isinagawa ang paglalagda sa memorandum of agreement sa pagitan ng NPC at PUP sa President’s Board Room na sinaksihan ng ilang opisyal ng naturang samahan at institusyon.

Inaasahan namang magpapatuloy ang nasimulang mga programa ng PUP para sa kapakanan ng mga mamamahayag at kanilang mga dependent. RNT