MANILA, Philippines- Muling magpapatupad ng dagdag-presyo sa mga produktong petrolyo ang mga kompanya ng langis sa bansa epektibo bukas ng umaga.
Sa abiso ng mga kompanya ng langis sa bansa na pinangunahan ng Pilipinas Shell, Petron Corporation, Seaoil, PTT Philippines, Total Philippines, Unioil, Petro Gazz at Phoenix Petroleum, magpapatupad sila ng dagdag presyo na P0.45 sa kada litro ng gasoline, P0.90 sa kada litro ng diesel at P0.30 naman sa kada litro ng kerosene na magiging epektibo alas-6 bukas ng umaga.
May oil price hike din sa presyo ng mga produktong petrolyo sa kahalintulad na halaga ang kompanyang Caltex (CPI) na magiging epektibo alas-12:01 bukas ng madaling araw habang ang kompanyang CleanFuel ay magiging epektibo alas-4:01 bukas ng hapon.
Ang ipatutupad na dagdag-presyo sa produktong gasolina at diesel ay bunsod sa patuloy na paggalaw ng presyuhan nito sa pandaigdigang merkado.
Matatandaan na nito lamang nakaraang Martes ay nagpatupad ng dagdag na P1.10 sa kada litro ng gasolina at P0.20 sa kada litro ng diesel habang wala namang paggalaw sa presyo ng kerosene. JR Reyes
