MANILA, Philippines — Pinag-aaralan ng Department of Social Welfare and Development (DSWD) ang paglipat sa digital disbursement para sa ikalawang tranche ng cash relief assistance para sa public utility vehicle (PUV) drivers, kasabay ng pagdaraos ng online “Virtual Financial Service Providers (FSP) Summit” sa Miyerkules.
Sa isang social media post nitong Martes, sinabi ni DSWD Secretary Rex Gatchalian na isinagawa nang manu-mano ang unang round ng payout upang matiyak na lehitimong mga driver ang mga benepisyaryo, lalo na’t mula sa external sources sa labas ng ahensya ang mga listahan.
“The 1st round of payouts for public utility drivers was done manually to make sure that we verified and validated that the drivers were real drivers (and real people) especially since the lists were coming from external sources beyond DSWD. It’s like the ‘know your customer’ phase of banks when opening bank accounts. For the succeeding rounds, we (will) go digital payouts for PUV drivers who have e-wallets — TNVS (transport network vehicle service), MC (motorcycle) taxi, and delivery service drivers,” saad sa post ni Gatchalian sa X.
Ayon sa DSWD, bukas ang summit para sa mga e-money issuer, mobile wallet operator, at financial technology provider bilang bahagi ng pagpapahusay sa pamamahagi ng ayuda sa ilalim ng Assistance to Individuals in Crisis Situations (AICS) program.
Sinabi ng ahensya na ang hakbang ay nakabatay sa mga naging aral mula sa unang rollout ng cash relief assistance at layuning mapabuti ang serbisyo sa mga transport worker na apektado ng tumataas na presyo ng langis dulot ng nagpapatuloy na sigalot sa Middle East.
Sa hiwalay na pahayag, sinabi ni Assistant Secretary Johannes Paulus Acuña, Chief Information Officer ng DSWD, na makatutulong ang digital disbursement upang mabawasan ang administrative at operational costs at mapabilis at mapadali ang pag-access ng mga benepisyaryo sa ayuda.
“Magbibigay-daan po ito sa mas accessible at efficient na financial payments, kung saan mas maraming benepisyaryo ang mabilis na masiserbisyuhan at mababawasan din ang mga administrative costs sa manual distribution,” ani Acuña.
Tiniyak ng DSWD na mananatili ang safeguards at verification mechanisms habang tinitingnan nito ang accreditation ng mga financial service provider na kayang magsagawa ng real-time, account-based transfers sa pamamagitan ng e-money at mobile wallet platforms.
Ayon pa sa ahensya, nakaayon ang inisyatiba sa Republic Act Nos. 12254 at 11032, gayundin sa Commission on Audit Circular 2021-014 hinggil sa paggamit ng electronic payment systems sa mga transaksyon ng pamahalaan.
Maaaring sumali sa virtual summit ang mga interesadong digital financial service provider sa pamamagitan ng QR code na inilathala sa opisyal na Facebook page ng DSWD na @dswdserves. Santi Celario
