MANILA, Philippines – AABOT sa walumpu’t dalawang (82) agrarian reform beneficiaries (ARBs) na mga miyembro ng Abejed Multi-Purpose Cooperative (AMPC) sa Tugop, San Fernando, Bukidnon, ang nakatanggap ng P1.5 milyong halaga ng bamboo stick-making machine at kagamitan mula sa Departments of Agrarian Reform (DAR), Trade and Industry (DTI), Environment and Natural Resources (DENR) at local government unit (LGU) ng San Fernando para bigyang kapasidad ang kooperatiba na magpatakbo at mamahala ng kanilang sariling kumikitang negosyong sakahan.
Ayon kay Mohammad Abdul Jabbar M. Pandapatan, DAR-Bukidnon Provincial Agrarian Reform Program Officer II na ang makina at kagamitan ay ibinigay sa ilalim ng DTI-CARP Village Level Farm Focused Enterprise Development (VLFED) Project.
Ani Pandapatan bukod sa makina at kagamitan, nag-ambag din ang DAR ng P240,000 para maiayos ang shared service facility at nagsagawa ng serye ng bamboo-related capacity development training kasama ang mga partner agencies.
“Nagbigay ang DENR ng mga punla ng kawayan, input at labor provision habang ang LGU ng San Fernando ay nagbigay ng construction materials para sa pasilidad,” aniya.
Sinabi ng Pandapatan na ang paglulunsad at commissioning ng bamboo stick production facility ay simula lamang ng mga suporta na ipagkakaloob ng DAR sa AMPC sa kanilang pagsisimula sa mapanghamong paglalakbay upang matiyak ang napapanatiling paglago para sa kanilang negosyo.
“Kailangan pa rin nila ng all-weather dryer para sa treated barbecue sticks. At nais naming tiyakin sa kanila ang patuloy na suporta ng DAR at ng lahat ng mga ahensyang kasosyo nito. Alam namin na sa katatagan at determinasyon ng kooperatiba, ang isang magandang kinabukasan ay abot-kamay na nila,” aniya.
Pinasalamatan ni Purita S. Intes, Chairperson ng AMPC ang DAR at ang mga katuwang na ahensya nito sa tulong na ibinigay sa kooperatiba.
Naalala niya kung paano bilang isang maliit na kooperatiba, sila ay nahirapan sa pananalapi para lang makuha ang lote kung saan ginawa ang processing center.
“Sa pamamagitan ng determinasyon ng kooperatiba na ituloy at gawing negosyo ang produksyon ng bamboo stick at sa suporta ng mga line agencies, nagawa naming gawing realidad ang pangarap na ito,’ sabi niya.
Ang proyekto ng VLFED ay naglalayon na pahusayin ang mga produkto ng mga ARB gamit ang naaangkop na mga pasilidad at kagamitan para sa agri-business enterprise. Santi Celario
