P1M pabuya alok sa pagkadakip sa pumaslang sa ABP partylist nominee

MANILA, Philippines – NAG-ALOK ng P1 milyong pabuya ang “Ang Bumbero ng Pilipinas” (ABP) sa sinumang makapagtuturo sa kinaroroonan ng mga pumatay kay Leninsky “Bogs” Bacud, ikatlong nominee ng ABP, na brutal na pinaslang noong Abril 28, 2025 sa P. Guevarra St. Bgy.435 Sampaloc, Maynila.

“Hindi ito basta pagpatay. Isa itong pag-atake sa isang taong buong-pusong naglingkod sa bayan. Hindi kami tatahimik hangga’t hindi nakakamit ang hustisya,” pahayag ng ABP.

Kinilala ang mga suspek na sina Arnold “Ford” Glean Umandap at Joshua Hernandez Andaleon. Noong Hulyo 30, naglabas ang Regional Trial Court, Branch 33 ng non-bailable warrant of arrest laban sa kanila.

Naka-alerto na ang mga pulis na nagsasagawa ng manhunt operation at sa lahat ng operasyon ay kailangang may body cam na gagamitin. Si Arnold Umandap ay huling nakatira sa 47 Ruiz Street, Eastern, NCR samantalang si Joshua Andaleon naman ay nakatira sa Pantihan I, Balayungan, Maragondon, Cavite.

Si Umandap ay pinuno ng isang grupong peke na iligal na gumagamit ng pangalan ng ABP. Si Andaleon naman ang sinasabing isa sa mga sakay ng motor na ginamit sa pananambang kay Bacud. Malakas ang hinalang may pulitikal na motibo sa likod ng isinagawang krimen.

“Nananawagan kami sa publiko—kung may alam kayo ay magsalita na para sa ikadadakip ng mga kriminal. Bawat impormasyon ay mahalaga,” dagdag ng ABP.

Makipag-ugnayan sa PNP Hotline: 117 CIDG: 0951-059-3843. Ang ₱1 milyong pabuya ay ibibigay sa sinumang makapagbibigay ng tamang impormasyon at ituturing na confidential. Makakaasa na sisiguraduhing ligtas ang sinuman na magbibigay ng tip o impormasyon.

“Ito ay laban para katotohanan, hustisya at para sa layunin ng aming kilusan. Hindi kami uurong. Hindi kami titigil. Hahabulin namin ang mga salarin hanggang sa makamit ang hustisya,” buwelta ng ABP. RNT