MANILA, Philippines – Naipalabas na ang nalalabing P27 bilyong pondo ng pamahalaan para sa COVID-19 health emergency allowance (HEA) ng healthcare workers, sinabi ng Department of Budget and Management (DBM) nitong Miyerkules, Hulyo 31.
“The DOH requested an amount of more than P27 billion, so the DBM, under SARO (Special Allotment Order) No. BMB-B-24005240 dated July 5, 2024, as well as the corresponding cash requirement issued under NCA (Notice of Cash Allowance)-BMB-B-24-009106 to cover the payment for public health emergency benefits allowance of eligible health care workers and non-health workers was released,” pahayag ni Budget Secretary Amenah Pangandaman.
Ayon sa DBM, ang P27.453-billion budget, na inilabas sa pamamagitan ng SARO at NCA, ay sasakop bilang kabayaran sa 4,283 COVID-19 Sickness and Death Compensation claims para sa eligible healthcare at non-healthcare personnel maging ang 5,039,926 validated ngunit unpaid health emergency allowance.
Ang pahayag na ito ni Pangandaman ay kasabay ng pagdinig ng Senate Committee on Health and Demography nitong Martes, Hulyo 30.
“Nailabas na po namin nung July 5 ‘yung SARO at yung NCA para po mai-distribute na po ‘yung balanse. Naka-address po ito sa Department of Health dahil sila po ang mag-i-implement po ng distribution,” ani Pangandaman.
Ang pagbabayad sa lahat ng mga unpaid arrears para sa HEA ay ipinag-utos ni Pangulong Ferdinand Marcos Jr. RNT/JGC
