MANILA – Nakumpiska ng Criminal Investigation and Detection Group (CIDG) ang PHP46 milyong halaga ng smuggled secondhand na damit, o “ukay-ukay,” sa Meycauayan City, Bulacan.
Sinabi ni CIDG chief Brig. Gen. Nicolas Torre III na inaresto ng mga operatiba ang limang suspek, kabilang ang mga indibidwal na may alyas na Shawn at Liang, sa operasyon noong Miyerkules, ang Oplan Megashopper, na target ang mga smuggled at pekeng produkto.
Nasamsam ng mga awtoridad ang 23,614 na bundle ng imported used clothing, isang Isuzu truck, mga business documents, passport, at identification card.
Nahaharap ang mga suspek sa kasong paglabag sa Republic Act 4653, na nagbabawal sa commercial importation ng mga gamit na damit at basahan. RNT
