MANILA, Philippines – Inaprubahan ng House of Representatives nitong Biyernes sa ikalawang pagbasa ang panukalang ₱6.973-trilyong pambansang badyet para sa 2026 sa pamamagitan ng voice vote, matapos bawasan ang pondo ng Department of Public Works and Highways (DPWH), Office of the Vice President (OVP), at mga unprogrammed fund.
Muling inilalaan ng Kamara ang ₱255 bilyon mula sa DPWH patungo sa mga programang panlipunan, kung saan ₱56 bilyon ang mapupunta sa sektor ng edukasyon — kabilang ang Philippine Science High School System, CHED, TESDA, at mga state universities and colleges.
Ibinaba rin ang panukalang ₱889-milyong pondo ng OVP at ibinalik sa antas ng 2025 na ₱733 milyon, kasunod ng pagtanggi ni Vice President Sara Duterte na personal na ipagtanggol ang kanilang badyet sa plenaryo.
“We want to protect the interests of the personnel within the Office of the Vice President and ensure that the final budget will be sufficient for that,” pahayag ni House appropriations chair Rep. Mikaela Suansing.
Tinanggal din ng Kamara ang ₱35 bilyon na pondo para sa mga proyekto sa imprastraktura sa ilalim ng unprogrammed fund at inilaan ang ₱45 bilyon para sa mga social program gaya ng tulong sa mga magsasaka at pondo para sa DSWD’s 4Ps conditional cash transfer program. RNT
