MANILA, Philippines – Mahigit P651 milyon ng P2.5 bilyong fuel subsidy na ang naipamahagi sa public utility vehicle (PUV) drivers at operators sa buong bansa, ayon sa Land Transportation Franchising and Regulatory Board (LTFRB).
Sa kalatas nitong Lunes, Marso 30, sinabi ng LTFRB na inatasan na ni chairperson Atty. Vigor Mendoza II ang lahat ng regional directors na siguruhin ang mabilis, komportable at hassle-free na distribusyon ng ayuda.
“We encountered several minor challenges, especially in the distribution in Metro Manila, and these challenges became learned lessons that were utilized to prevent similar incidents, especially in the provincial distribution in the past days, and in the coming days,” ani Mendoza.
“The goal still remains, fast distribution of the fuel subsidy and we assure our friends and partners in the PUV sector that we are on the right track,” dagdag pa niya.
Nagsimula na ang pamahalaan ng pag-rollout ng fuel subsidy sa mga drayber at operator noong Marso 25.
Sa kabuuang P651,185,000 na naipamahagi, ang mga rehiyon na may pinakamalaking alokasyon ay ang Metro Manila sa P181.2 million, CALABARZON sa P98.2 million, at Central Luzon sa P73.4 million.
Sakop ng programa ang mga drayber at operator ng modern at traditional jeepneys, UV Express, passenger at point-to-point buses, Transport Network Vehicle Service partners, Filcabs, taxis, tricycles at delivery services. RNT/JGC
