MANILA, Philippines – Inamin ng isang testigo ng House prosecution na nag-award ang lokal na pamahalaan ng Davao City ng tinatayang P7 milyon hanggang P8 milyon na halaga ng mga kontrata sa GenCorp Industries nang hindi dumaan sa public bidding.
Sa ika-30 araw ng impeachment trial kay Vice President Sara Duterte nitong Lunes, sinabi ni Philippine Government Electronic Procurement System (PhilGEPS) Division Chief Rendell Sopeña na sa 15 kontrata na iginawad ng Davao City government sa GenCorp, apat lang ang dumaan sa public bidding.
“If I remember correctly, 11 did not undergo public bidding. So this comes out to roughly P7 million or P8 million,” tugon ni Sopeña sa mga tanong ni Senator-judge Risa Hontiveros.
Sinabi rin ni Sopeña na umabot sa P35 milyon ang kabuuang halaga ng mga kontratang iginawad ng mga ahensya ng gobyerno sa GenCorp habang nakaupo si VP Duterte bilang bise presidente.
Aniya, may kabuuang 49 kontrata ang natanggap ng naturang kampanya na pag-aari ni Vice President Sara Duterte.
Bukod sa Davao City government, nag-award din sa GenCorp ang Philippine Health Insurance Corporation Region 11 at ang Overseas Workers Welfare Administration Region 11.
Naiuugnay ang GenCorp kay VP Duterte dahil nakalista ito sa kanyang Statement of Assets, Liabilities and Net Worth (SALN) bilang isa sa kanyang business interests.
Pero ayon sa isa pang testigo mula sa Securities and Exchange Commission, wala naman ang pangalan ni Duterte sa corporate records ng GenCorp bilang owner.
Tinanong din ni Senator-judge Raffy Tulfo kung may conflict of interest sa pagitan ng Davao City at GenCorp.
“Si VP Sara ay isa sa may-ari ng GenCorp and then yung Davao ay balwarte niya. Wala bang conflict of interest dito?” tanong ni Tulfo.
Sagot ni House lead prosecutor at Batangas 2nd District Rep. Gerville Luistro: “That particular scenario, if there are SALNs already which the respondent, the vice president herself, acknowledged, admitted that she is part of this corporation, then GenCorp should not be participating in the bidding of the City of Davao, which is headed by no less than the brother of the respondent, the vice president.”
Ayon kay Luistro, tatlong paglabag ang nagawa ni Duterte kaugnay sa mga kontrata ng GenCorp sa Davao City: pagmamay-ari ng negosyo, pag-ooperate ng negosyo, at pagkakaroon ng conflict of interest.
“Kumbaga sa larong tong-its, three hits po ito,” dagdag ni Luistro.
Pinatanggal naman agad ni Senate President at impeachment court presiding officer Francis Escudero ang pahayag na iyon sa record matapos tumutol ang defense panel dahil anila ito ay “conclusion of law.”
Inisyuhan na rin ng subpoena ang kapatid ni VP Sara na si Davao City Mayor Sebastian “Baste” Duterte upang humarap sa impeachment court ngayong linggo kaugnay ng naturang kontrata ng GenCorp.
Patuloy na tinatalakay ng Senado ang Article II ng Articles of Impeachment na nagsasabing pumasok si VP Duterte sa mga kontrata sa gobyerno sa pamamagitan ng kumpanyang idineklara niya sa kanyang SALN habang siya ay nakaupo bilang bise presidente. Ernie Reyes
