MANILA, Philippines – “Never surrender to foreign power.”
Ito ang payo ni Sen. Robin Padilla kay Sen. Ronald “Bato” Dela Rosa matapos lumabas ang mga ulat na may inilabas nang warrant of arrest laban kay Dela Rosa mula sa International Criminal Court (ICC).
Ayon kay Padilla, wala silang direktang komunikasyon ni Dela Rosa dahil nag-iingat umano ito. “Sanay siyang sundalo/pulis at alam niyang maaaring mino-monitor ang aming cell phones,” sabi niya.
Si Dela Rosa ang namuno sa Philippine National Police noong panahon ni dating Pangulong Rodrigo Duterte.
Pareho silang kinasuhan sa ICC ng crimes against humanity dahil sa war on drugs na nagresulta sa pagkamatay ng libo-libong drug suspects.
Matatandaang hindi na dumadalo si Dela Rosa sa Senado mula Nobyembre 10 matapos sabihin ni Ombudsman Jesus Crispin Remulla sa isang radio interview na may warrant na umano mula sa ICC laban sa senador. Katulad na pahayag ang inilabas ni dating presidential spokesperson Harry Roque sa Facebook nitong weekend.
Samantala, si Duterte ay nakakulong sa ICC sa Netherlands mula noong Marso. RNT/MND
