MANILA, Philippines — Sinabi ng Philippine National Police (PNP) nitong Martes na bine-beripika pa nila ang mga ulat na ang gambling tycoon na si Charlie “Atong” Ang ay nakalabas na ng bansa.
“The last known place he had gone to—of course, that was a long time ago—was still here in the Philippines,” pahayag ni PNP chief Gen. Jose Melencio Nartatez Jr. sa mga mamamahayag sa isang panayam sa Camp Crame.
“If there were reports that he had already fled the country, we are verifying them. But, most likely, he is still here in the Philippines,” dagdag niya.
Si Ang ay hinahanap ng mga korte sa Laguna at Batangas kaugnay ng umano’y pagdukot at pagpatay sa hindi bababa sa 34 na sabungero na di-umano’y nandaya sa kanyang mga laro sa pagitan ng 2021 at 2022.
Nauna nang sinabi ni Interior Secretary Jonvic Remulla na halos mahuli na ng pulisya si Ang sa isang tirahan sa Cavite noong unang bahagi ng taong ito ngunit nakatakas ito isang araw bago sinalakay ng mga operatiba ang bahay.
Ayon kay Remulla, naglalakbay si Ang kasama ang isang maliit na grupo at lumilipat ng lugar sa Calabarzon tuwing dalawang araw upang makaiwas sa pag-aresto.
Nauna nang sinabi ng kalihim na ang kanyang ahensya ay nag-iimbestiga sa impormasyong ibinigay umano ng sabungeros whistleblower na si Julie Patidongan, na kilala rin bilang Totoy o Dondon, na nagsabing tumakas si Ang patungong Cambodia.
Gayunpaman, kinumpirma ng Cambodian Ministry of Foreign Affairs na wala si Ang sa kanilang bansa. RNT/MDS
